Ársskýrsla og sjálfbærniuppgjör Skaga
Verulegur afkomubati af grunnrekstri samstæðu
Árið 2025 var viðburðaríkt hjá Skaga samstæðunni og vel gekk á flestum vígstöðvum, sér í lagi í grunnrekstri samstæðunnar þar sem rekstrarafkoma þrefaldaðist á milli ára. Mestu munaði þar um sögulega góðan rekstrarárangur í tryggingastarfseminni en áhersla á tekjuvöxt í fjármálastarfseminni skilaði sér einnig í aukinni stærðarhagkvæmni og betri arðsemi samhliða því. Þá gekk samþætting á starfsemi ÍV inn í samstæðu Skaga að mestu vel og er nú lokið. Ávöxtun fjárfestingareigna var hins vegar talsvert undir markmiðum ársins, sem kemur að mestu til vegna neikvæðrar þróunar á hlutabréfamörkuðum, en var þó í takt við viðmiðunarvísitölur og nokkru betri en hjá samkeppnisaðilum.
Í október var tilkynnt um að formlegar samrunaviðræður við Íslandsbanka væru hafnar en í samruna félaganna felast mikil tækifæri til hagsbóta fyrir alla haghafa. Hagnaður samstæðunnar nam 1.902m og arðsemi til hluthafa nam 8,6% á árinu sem er undir markmiði félagsins en ásættanlegt í ljósi áskorana í fjárfestingarstarfsemi.
Ávarp stjórnarformanns
Stefán Héðinn Stefánsson
Árið 2025 var að mörgu leyti sterkt rekstrarár hjá samstæðu Skaga. Nú, þremur árum eftir að við kynntum breytta framtíðarsýn fyrir Vátryggingafélag Íslands hf. má segja að við séum byrjuð að uppskera af okkar vinnu. Eftir mikið umbreytingarár árið 2024, þar sem við færðum okkur í núverandi móðurfélagsfyrirkomulag og keyptum Íslensk verðbréf inn í samstæðuna, var áhersla lögð á innri vöxt og aukna arðsemi af rekstri, hvort sem er í vátryggingar- eða fjármálastarfsemi félagsins. Það verkefni hefur gengið vel þó við teljum okkur enn eiga talsvert inni.
Ávarp forstjóra
Haraldur I. Þórðarson
Það má segja að árið 2025 sé árið þar sem við byrjuðum að uppskera eftir tímabil stefnumótunar og samþættingar árin á undan. Tekjur í grunnrekstri samstæðunnar jukust um 12% en afkoma af grunnrekstrinum þrefaldaðist milli ára, úr 800 milljónum í rúmlega 2.400 milljónir. Árið var einstaklega gott í tryggingarekstri, þar sem VÍS skilaði sinni bestu afkomu af tryggingum í sögu félagsins og áhersla okkar á tekjuvöxt í fjármálastarfseminni undanfarin ár er farið að skila sér í aukinni stærðarhagkvæmni og betri arðsemi samhliða því en afkoma af fjármálastarfsemi jókst verulega á milli ára.
Dótturfélög
Í samstæðunni eru þrjú sjálfstæð dótturfélög; VÍS tryggingar, Fossar fjárfestingarbanki og Íslensk verðbréf.
Lögð er áhersla á framúrskarandi þjónustu og traust langtímasamband við viðskiptavini. Enn fremur er samstæðan í fararbroddi þegar kemur að tengingu íslensks atvinnulífs við alþjóðlegt fjárfestingarumhverfi.
Skagi á markaði
Velta með bréf Skaga jókst frá fyrra ári. Heildarvelta með bréf félagins í Kauphöllinni var tæpur 21 milljarður og jókst um 21% milli ára. Dagleg meðalvelta var um 84 milljónir króna og jókst um 21% milli ára sömuleiðis. Fjöldi viðskipta voru 1.896 talsins á síðasta ári. Gengi bréfa félagsins í upphafi árs var 21,6 og lok árs 19,9 — og lækkaði því um rúm 8% prósent á síðasta ári. Markaðsvirði félagsins var 38,1 milljarðar í lok árs 2024 en 41,2 milljarðar árið áður.
Tíu stærstu hluthafar Skaga
| Hluthafar 1. janúar 2026 | Hlutur | Fjöldi hluta |
|---|---|---|
| Sjávarsýn ehf. | 9,8% | 187.990.421 |
| Lífeyrissjóður starfsmanna ríkisins A-deild | 8,7% | 166.200.000 |
| Skel fjárfestingafélag hf. | 8,2% | 156.956.533 |
| Gildi - lífeyrissjóður | 8,2% | 156.587.657 |
| Lífeyrissjóður verzlunarmanna | 7,8% | 150.218.970 |
| Frjálsi lífeyrissjóðurinn | 7,5% | 143.708.336 |
| Klettar fjárfestingar ehf. | 4,8% | 91.851.004 |
| Stapi lífeyrissjóður | 4,2% | 80.913.379 |
| H3 ehf. | 2,9% | 55.985.315 |
| Birta lífeyrissjóður | 2,9% | 54.927.843 |
Stjórn Skaga
Í stjórn félagsins sitja þau Stefán H. Stefánsson, stjórnarformaður, Vilhjálmur Egilsson, varaformaður, Hrund Rudolfsdóttir, Marta Guðrún Blöndal og Ásgeir Helgi Reykfjörð Gylfason. Varamenn eru þau Sveinn Friðrik Sveinsson og Ragnheiður Hrefna Magnúsdóttir.
